ETSE биржасы туралы

ETSE (Eurasian Trading & Settlement Exchange) — «Астана» халықаралық қаржы орталығының (AIFC) юрисдикциясында көпжақты сауда алаңы (MTF) форматында құрылған Қазақстан Республикасының алғашқы экспорттық-импорттық тауар биржасы.

ETSE тарихы Қазақстанның ең ірі тауар биржасы инфрақұрылымын — 2009 жылдан бері қызмет атқаратын және ұлттық биржалық сауда нарығында тұрақты беделге ие «Еуразиялық сауда жүйесі» тауар биржасы» АҚ-ның (ETS) дамуына негізделген.

ETS биржасы Қазақстан Республикасы тауар нарығының көшбасшыларының бірі болып табылады және әлеуметтік маңызы бар және шикізат тауарлары бойынша ұйымдастырылған сауданың елеулі көлемін қамтамасыз етеді. ETS меншікті технологиялық платформасы сауданың жоғары сенімділігін, мәмілелердің ашықтығын және сауда деректерін ұзақ кезеңге архивтеуді қамтамасыз етеді.

Ұлттық биржалық инфрақұрылымды кеңейту және халықаралық юрисдикцияда экспорттық-импорттық саудаларды дамыту мақсатында 2021 жылғы маусымда «ETS» тауар биржасы» АҚ мен «Астана» халықаралық қаржы орталығы арасында AIFC шеңберінде тауар биржалық нарығын қалыптастыру бойынша ынтымақтастық туралы меморандум қол қойылды.

2022 жылы АХҚО юрисдикциясында көпжақты сауда алаңы (MTF) мәртебесінде ETSE экспорттық тауар платформасын құруға және аккредиттеуге дайындық процесі басталды.

Жобаның институционалдық қалыптасуындағы негізгі кезең лицензия алу болды.

2024 жылғы 11 шілдеде «Астана» халықаралық қаржы орталығының Қаржылық қызметтерді реттеу комитеті (AFSA) ETSE Ltd. компаниясына Multilateral Trading Facility (MTF) ретінде қызметті жүзеге асыруға лицензия берді.

ETSE экспорттық-импорттық операциялар мен трансшекаралық саудаға баса назар аудара отырып, шикізат және әлеуметтік маңызы бар тауарлармен ұйымдастырылған саудаға маманданған AIFC юрисдикциясындағы алғашқы MTF-алаңы болды.